Lajm - Psh | Sistemi Prokurorial i Republikës së Kosovës
left stars
right stars

Aktakuzë ndaj njëzet personave për Kontrabandim me migrantë

Mitrovicë, 15 shkurt 2022 – Prokuroria Themelore në Mitrovicë - Departamenti i Krimeve të Rënda, ka ngritur aktakuzë, në Gjykatën Themelore në Mitrovicë, kundër tetë (8) të pandehurve me iniciale S.S., B.P., Sh.Xh., H.M., H.D., R.A., M.K., IS., për shkak të dyshimit të bazuar për kryerjen e veprës penale “Kontrabandimi me migrantë” nga neni 164, paragrafi 5 lidhur me  paragrafin 1 dhe nenin 31 të KPRK, si dhe dymbëdhjetë (12) të pandehurve me iniciale T.F., H.K., B.E., A.I., V.N., R.N., A.N., A.P., M.P., N.K., B.H., dhe I.S., për shkak të dyshimit të bazuar për kryerjen e veprës penale “Kontrabandimi me migrantë” nga neni 164, paragrafi 1 dhe nenin 31 të KPRK dhe lidhur me nenin 77 të Kodit Penal të Republikës së Kosovës.

Sipas kërkesës së prokurorisë të dorëzuar në gjykatë, ekziston dyshimi i bazuar se të dyshuarit kanë organizuar kontrabandimin e migrantëve – shtetas të huaj sirianë, me qëllim të përfitimit të drejtpërdrejtë të dobisë pasurore nga hyrja e paligjshme e personave në Republikën e Kosovës e të cilët nuk ishin shtetas të Republikës së Kosovës, duke u mundësuar të njëjtëve kalimin e kundërligjshëm të kufirit Kosovë-Serbi.  

 

Prokurori i Shtetit, i ka propozuar Gjykatës Themelore në Mitrovicë, që të pandehurit t’i shpallë fajtorë për veprat e kryera penale dhe ti dënojë sipas ligjit.